العمل الحر

مقالتي ( باللهجة العامية المفهومة ) عن تجربتي كـ عامل حر لمدة تتجاوز الخمس سنوات على التوالي
لازم تعرف مخاطر العمل الحر قبل ما تفكر أنك تشتغل بشكل حر بعيد عن جو الشركات

 

[ الموضوع مُفصل ]

الفري لانسر، مدخوله المادي أفضل بكثير من مدخول الشركات والمحلات.. بحال كنت عامل حر بأيا اختصاص واثق من شغلك وعرفان حالك شو عم تعمل 😊 رح تواجهك شوية مشاكل رح اذكرها بمقالتي هي، هدف المقالة توضحلك مشاكل العمل الحر، والمعضلات يلي ممكن تواجهها كـ فريلانسر حسب تجربتي الشخصية لنهاية سنة 2018

 

إدارة الوقت

بالشغل التقليدي [ الشركات ] انتا قاعد بمكتبك وناطر مشروع من قبل شركتك لتنفذه، ما اجا مشاريع للشركة، انتا قاعد وراتبك شغال.أما بالعمل الحر، الوضع مختلف تماماً لأن [ الوقت = دولارات ] كل دقيقة بتضيعها بطير من دخلك كتير، لو ما عرفت تنظم وقتك رح تخسر كتير، فـ لازم قبل ما تاخد مشروع تدرسه كتير منيح + تعرف الوقت التقريبي لإنتهاء المشروع + تحدد السعر بناءً على هالشي بتلتزم بالوقت وتنفذ المشروع بالوقت المحدد لأن العمل شبه مستحيل يزودلك على السعر المتفقين عليه.

 

__ راقب وقتك وعطي لنفسك تقييم وشوف يلي عم يضيعلك وقتك وتجنبه بحيث ما يتكرر بالمستقبل __

 

تحديد تفاصيل المشروع

العميل شخص مش فاهم شغلك + العميل بيطلب تعديلات بشكل دائم ومستمر وما بيخلص طلبات، لتتخلص من هاد الموضوع لازم تكون دارس المشروع كتير منيح ومقدملو مخطط للمشروع [ مخطط مصوّر ] عن طريق احد البرامج وتفهميه كل صغيرة وكبيرة بالموقع وتسأله عن الألوان والإتجاهات، بما معناه أقل التفاصيل لازم تخبره ياها قبل البدء، ولازم تتأكد انها وصلتو بشكل صحيح حتى ما يغلبك وانتا بتشتغل، والأهم لازم تفهمه ان التعديلات الجذرية [ بمقابل مادي ] وما توصل لدرجة إنك تمّل من الزبون وبس بدك تخلص من مشروعه وتصير تشتغله بشكل مجاني، هالشي غلط، ادرس الموضوع [ كن صبوراً ] بحيث ما تطلع من المشروع خسران.

 

حياتك الشخصية

لو بتشتغل انتا بشركة، علاقتك بالشغل بتنتهي بإنتهاء مواعيد العمل. أما بالعمل الحر، الموضوع مزاجي، انتا بتشتغل بالوقت يلي بدك ياه وبراحتك وحسب مزاجك، بس انتبه كتير.. على قد جمال هالشي، بنفس الوقت ممكن يدمر حياتك، وما تنسى ان كنت متزوج او عندك عشيقة، توفق بين وقت شغلك وقت حياتك ( بحاجة لدراسة أكتر ) لو بدك تشتغل بشكل حر، لازم تحدد لنفسك وقت تشتغل فيه ووقت تنتهي فيه من العمل وبعد الوقت هاد، بترجع لحياتك الشخصية وبترفه عن نفسك وبتعيش حياتك بشكل طبيعي بتطلع مع صحابك، بتسهر، بترفه عن نفسك بأي طريقة انتا بتشوفها مناسبة، حاول ما تخلط عملك بحياتك، العمل شي وحياتك الشخصية شي تاني تماماً.

 

مكان العمل

مو لأنك فري لانسر تشتغل بأي مكان!! لأنو لو عملت هيك رح تصيبك حالة تشتت ورح تلاقي مزعجين كتير رح يقطعولك سلسلة افكارك وتركيزك، فـ لازم تخصص مكان تشتغل فيه وتجبر كل يلي حوليك يلتزمو بموعد شغلك بحيث ما حدا يزعجك نهائياً.

 

__ حدد سعر خدماتك، لا تتهاون لا تقلل من قيمة سعر خدمتك مهما كلف الأمر __

 

النصب

مافي شي أسمه، اشتغل لو عجبني الشغل بحولك دولارات، دائماً نصف المبلغ قبل البدأ، والزبون يلي ما بيوثق فيك، بلاه أفضل، وما تخاف لو المشروع راح بكون مو نصيبك، بما معناه لا تشتغل وتوثق بالعميل لدرجة انك تشتغل شهر كامل وبالأخر ما تحصل شي منه، انتبه على هاد الموضوع.

 

طور من نفسك

لازم تضل مواكب حركات المواقع الضخمة والمبرمجين الكبار لتعرف الأشياء يلي عم تصير بالأيام هي، وتواكبها لأن اغلب الزباين بيشوفو اشياء معينة بموقع معين وبيطلبو منك تنفذها.. خليك مواكب الأمور وعم تطور من نفسك لا توقف ابداً، بوقت فراغك درّب نفسك على اشياء جديدة عليك لأنو رح يجي يوم واحد ويطلبها منك.

 

__ تابع الأساتذة الكبار على يوتيوب وزيد مهاراتك، بس لا تشتغل مجاناً لحدا __

 

سوّق أعمالك بنفسك

شو الفائدة أنك تكون مبرمج وما حدا بيعرف شغلك ولا بيعرفك؟

هي اكبر مشكلة رح تواجهها ببدايتك كـ فري لانسر، فـ لازم تسوق لنفسك وتسوق أعمالك لحتى الناس تعرفك وتطلب منك مشاريع، وممكن بالبداية تنزل أعمال مجانية بس لحتى الناس تعرفك وتعرف شغلك وإحترافيتك وإبداعك.

 

الترفيه

وهي أهم نقطة من كل ما سبق، لازم يكون ألك يوم اجازة تطلع فيه بعيد عن جو شغلك تماماً وخلي تماماً من اي شي بيتعلق بشغلك، اطلع مع رفيئتك مع صحابك مع اخواتك، انبسط وعيش حياتك حتى ترجع تاني يوم يكون فيك إنيرجي بتبلش شغل من جديد.

 

وأخيراً: حياة الفري لانسر صعبة نوعأ ما وممتعة نوعاً ما ( حسب تجربتي )، مدخولها ممتاز وصعبة ان ما استوفيت الأشياء السابقة، حاول تنظم وقتك وتعطي كل شي اهميته وحقه، وتميز بين شغلك وحياتك الشخصية وتكسب ثقة الزباين ويكون شغلك فيه خوف من رب العالمين لأن الناس أمنتك على أعمالها ومتاجرها..

ارجو ان كنت عاملاً حر ولديك أفكار ونصائح، لا تبخل علينا في تركها ضمن تعليق في الأسفل
أرجو لكم عمل حر موفق <3

avatar
5000
 
smilegrinwinkmrgreenneutraltwistedarrowshockunamusedcooleviloopsrazzrollcryeeklolmadsadexclamationquestionideahmmbegwhewchucklesillyenvyshutmouth
 
 
1 التعليقات
1 الردود
0 المتابعات
 
أشهر تعليق
التعليقات الساخنة
2 جميع التعليقات
Moh Farawatiاحمد آخر تعليقات الضيوف
احمد
ضيف
احمد
غير متصل

صديقي محمد انا قرأت المقالة كاملة والله يعطيك العافية
وبتشكرك عليها لأني مستقبلا عم فكر اعمل ك فريلانسر
عندي ملاحظة ع المدونة : بالحد الفاصل بين اللون الاسود والرمادي الكلمات عم تنقرأ بصعوبة كبيرة
حاول تعدل ع لون الخط او ع لون المدونة نفسها لحتى تصير اسهل للقارئ
بتمنالك التوفيق❤️




No results found

القائمة